علق الإعلامي عمرو أديب، علي خسارة الزمالك أمام إنبي وفوز الأهلي علي الجونة، اليوم الإثنين في منافسات الدوري المصري الممتاز.
الزمالك خسر من إنبي بهدفين مقابل هدف، والأهلي حقق الفوز علي الجونة بأربعة أهداف دون رد.
وقال أديب خلال تقديمه برنامج “الحكاية”، على شاشة “MBC مصر”: “الحمد لله أن ماتش الأهلي والزمالك اتأجل”.
وأضاف: “الأهلي اليوم حقق فوزًا على الجونة بأربع أهداف مقابل لا شيء، وأحرز اللاعب وليد سليمان ثلاثة أهداف”.
وتابع: “وبيقولوا شيكابالا تعبان شوية ومستواه نزل عشان كبر في السن، طب ما عندكم أهو وليد سليمان”.
وواصل: “جه فينا جون في الوقت اللي بنحبه كزمالك في الدقيقة 99 فى نكد غير طبيعي ونكد تاني من فوز الأهلي اللي مبقاش يلعب غير وبيكسب بالأربعات والخمسات”.
وعن حارس مرمى الزمالك محمد عواد، أشار: “عواد بقى يطلع لحد السنتر ويرجع تاني، ده مش حارس مرمى ده ظهير رابع، عواد باع أرضه يا ولاد، والناس الأهلاوية عمالين يقولوا بعد هدف محمد شريف بتاع إنبي شريف عمره ما بيضيع، طب أنا بقى عمري ما شوفت شريف بيلعب”.
وأكمل: “الزمالك قطع أملي في الدوري من بدري، أنا عيطت النهاردة، طب حاولوا تحافظوا حتى على المركز الثاني، ربنا يقتل أمالكم، عليه العوض ومنه العوض، طعم الحياة مر النهاردة، سنظل أوفياء”.
وأتم: “أنا أريد من فايلر أن ياخد إجازة شوية، حد يقوله المدام عاوزاك، العيال عاوزين يشوفوك، ما ترجع شوية فيه مشكلة، أي حاجة من دي”.
يذكر أن الأهلي يتصدر ترتيب جدول الدوري المصري برصيد 12 نقطة، بينما يقع الزمالك في المركز الرابع بـ 10 نقاط.